السلام عليكم ورحمة اللع تعالى وبركاته
البنات الله يخليكم إلى ما نصحوني وقولو ليا رايكم بصراحة راني ملقيت لمن نشكي همي . المهم ندخل في الموضوع راني تخطبت هاد الايام لواحد الشخص ميسور وخدام مزيان وعنده برطمة مع دارهم . هاد الشي كله زوين واخا تانويات المهم هو ولد خالت صاحبتي هي اللي قالت ليه عليا وعجبته على حسب داك الشي اللي عاودات ليه صاحبتي .المهم من بعد النظرة الشرعية الاولى خدا نمرة تلفوني قال لي باش نبداو نتعرفو على بعضياتنا . اول مساج غادي يسيفط ليا قال ليا فيه فاش خدامة واش مرسمة شحال وانتي خدامة وكيف داير الصالير.بقى فيا الحال حسيت بيه داخل على طمع واخا هو خدام مع الدولة. وكيتخلص مزيان . شوية بدا كيصيفط ليا مساجات فيهم خاصك تتهلاي في راسك وجسمك ووجهك ومع انا فيا شوية الحبوب قال ليا نبغي نشوف نتيجة المرة الجاية ملي يشوفني . حسيت بيه ممقتنعش بيا بزاف . مع العلم انه مرضي امع بزااااف وحيت امه عجبتها وحماقت علي جاني راسي بحال إلى داير ليها خاطرها .قلت ندير راسي مفهمتش والو قال ليا نتلاقاو باش نهضرو . وفي اللقاء الاول لينا قال ليا نحط فلوسي وفلوسك ونجمعوا باش نمشيوا للعمرة انا وامي وانتي والى مكملناش لفلوش نمشي انا وامي وانتي مرة اخرى . وعلق ليا على مشيتي قال ليا متمشيش محدورة .وقال لي داك الشي اللي في وجهك واش يحيد ولا لا وسنانك واش تقدري تديري ليباك . قلت ليه الى كان هاد الشي كله معاجبكش فيا علاش هاد الشي كله. قال لي غير بغيتك تكوني اجمل واجمل مع العلم انه زوين بزاف جاني بحال الى مغرور . بعدها بساعتين تبعني للدار هو وامه وخواتاته وجاني مصر باش يكمل في الزواج وهضرو مع الاب والام ديالي على كلشي . وتخيلوا البنات في مساجاته عمره ما سولني كيف قضيت نهاري او كيف هي احوالي كل مساجاته على انه لازمني نتهلى في راسي فقط . ملي قلت ليه انا ممسلكنيش هاد الشي ومكيهمونيش الشكليات قال لي عجبوني اخلاقك بزاف ومتفائل معاك بالخير. كيقول ليا متعاودي لحتى حد من غير امي وخواتاتي والى بغيتي تتشاوري تشاوري معاهم . عمري حسيت بالفرحة معاه . معرفتش واش نوقف هاد الخطوبة ولا لا كلشي كيقولو ليا توكلي على الله . مع العلم اني استخرت فيه الله بزااف ولكن باقية ممرتاحاش . كل مرة نقول هادي هي الاخيرو ولكن والو بحال الى شي حاجة كتوقفني نصحوني شنو ندير وكيفاش بان ليكم هاد الشي الله يخليكم ويرزقكم الجنة اجمعين ويعطيكم ما ناوين في خواطركم .
0 commentaires :
Enregistrer un commentaire